صدقت يا عمنا "شكوكو" يا فيلسوف عصرك
"الجد" بضاعة كاسدة فى الأسواق المصرية و كل أسواق التافهين , أما "الهلس" فماشاء الله بضاعة رائجة مربحة 100% . و حيث انى لا أمتلك عمارة و لا حتى شقة بعد 48 سنة من "الجد" , لهذا قررت أن أجرب نصيحة المرحوم "شكوكو" و اجرب الهلس . لكن المرحوم شكوكو ماقالش أى تفاصيل , لهذا قررت أحضر روح المرحوم شكوكو لأسأله .
و ذهبت الى جلسة تحضير الأرواح و بدأت الجلسة و نادى الوسيط على روح المرحوم "شكوكو" و بعد لحظات من الصمت سمعنا "طرااااااخ ......... آااااااااااااااااااااااى حرام عليك يا عم شكوكو قفايا ولع "
روح شكوكو : لا مؤاخذة افتكرتك "سراج منير" و افتكرت فيلم "شمشون و لبلب"
روح شكوكو : اسمه شمشون يا بنى آدم ,, و الرقابة غيرت الاسم و خلته "عنتر"
انا : ليه ؟ .... ووضعت يدى على قفايا استعدادا للقلم التانى
روح شكوكو : شمشون يا بنى يبقى بطل اسرائيلى كبير , عاوزهم يطلعوا "لبلب" بيضرب شمشون 7 أقلام ؟؟
انا : لأ طبعا مايصحش يا عم شكوكو
شكوكو : قولولى بقى انتم حضرتونى ليه
انا : كنت عايز أسألك عن الهلس يا عم شكوكو , عايز ابنى عمارة زيك , و انا غلبان ماحيلتيش حاجة
روح شكوكو تضحك ضحكته المعتاده : يا خرااابى , ده سؤال يا ابنى !!!!! انت مش مصرى زينا ؟!!! فيه مصرى مايعرفش الهلس ؟!!! يا ابنى دا احنا بنرضعه مع لبن أمهاتنا . الهلس عند المصرى هو منهج حياة , وارثينه أبا عن جد .
شوف يا ابنى كل مشكلة فى الدنيا و ليها حل الا فى مصر , كل حاجة فى وشك لازم تتعقد و تتلخبط , ماحدش بيريح حد , الحل الوحيد علشان ترتاح فى البلد دى هو الهلس , اضحك على كل حاجة , حتى على نفسك , يا اما كده يا اما تتجنن أو تنتحر , هلس يا ابنى و انت هاتبقى تمام , انا شايف فيك هلاس كبير زى كل المصريين , و ان شاء الله هاتبنى بدل العماره اتنين , ووعد منى هاجى اباركهم لك ان شاء الله
و مرت لحظات من الصمت ........
انا : يا عم شكوكو ....... انت مشيت و اللا ايه
الوسيط الروحانى : يظهر انه مشى خلاص .. يا ساتر,, فى ستين داهية ,, ايده تقيله قوى
و لم يكمل الوسيط الكلام , و سمعنا صوت "طرقعه " على قفاه , و صوت شكوكو يقول "التانى"
ليست هناك تعليقات:
إرسال تعليق